Ինչ կարող են պատմել ոտքերը ձեր մասին. ankakh.com

Մեր վերջույթներին քիչ ենք ուշադրություն դարձնում և խնամում: Բայց հենց վերջույթները կարող են հուշել, թե ինչ է կատարվում մեր օրգանիզմում: Եթե ոտքերը սառչում են, ապա դա խոսում է արյան վատ շրջանառության մասին՝ ծխելու, արյան բարձր ճնշման կամ սրտի հիվանդությունների հետ պայմանավորված:

Դիաբետի պարագայում նյարդերի ախտահարումը նույնպես կարող է ոտքերի սառչելու զգացում առաջացնել: Դա հնարավոր է նաև վահանաձև գեղձի հիվանդության կամ սակավարյունության հետևանք լինել: Բժիշկը կարող է օգնել հասկանալու դրա իրական պատճառը:

Երբ ոտքերը ցավում են, ապա դրա պատճառը հիմնականում կոշիկն ենք համարում. համենայն դեպս 10 մարդուց 8-ն այդ կարծիքին են: Սակայն, եթե ոտքերի ցավը կոշիկների հետևանք չէ, ապա կարող է ակտիվ ֆիզիկական մարզումների հետևանքով առաջացած ոչ մեծ ճաքը լինել ոսկրի մեջ, որը կոչվում է նաև սթրեսային կոտրվածք: Եթե ոսկրերը թուլացած են օստեոխոնդրոզի պատճառով, ապա սթրեսային կոտրվածք ստանալու հավանականությունը նույնպես մեծանում է:

Կարմիր, սպիտակ ու կապույտ մատներ

Նման ախտանշան լինում է Ռեյնոյի հիվանդության դեպքում. ոտքի մատները սպիտակում են, ապա կապտում ու վերջում կարմրում, հետո միայն նախկին գույնը վերականգնվում է: Դա կատարվում է երակների հանկարծակի սեղմման հետևանքով, ինչը մասնագիտական լեզվով կոչվում է վազոսպազմ: Պատճառը կարող է սթրեսը կամ ջերմաստիճանային փոփոխությունը լինել: Բարեբախտաբար, այս ախտանշաններն առողջությանը վնաս չեն հասցնում ու հետևանքներ նույնպես չեն լինում: Ռեյնո հիվանդությունը կարող է նաև ռևմատոիդ արթրիտի կամ վահանաձև գեղձի խանգարման հետ կապված լինել:

Երբ ոտքերն ասես այրվում են

Նման զգացում հիմնականում առաջանում է դիաբետով հիվանդների մոտ: Այդ հիվանդության դեպքում ախտահարվում է ծայրանդամային նյարդը: Նման զգացում կարող է առաջանալ նաև B վիտամինի, ոտքերի սնկի, երիկամների քրոնիկ հիվանդությունների, արյան անբավարար շրջանառության դեպքում:

Չսպիացող վերքերը ոտքերին կարող են հուշել դիաբետի մասին: Այդ հիվանդության պատճառով խանգարվում է ոտքերի զգայունակությունն ու արյան շրջանառությունը, և, անգամ հասարակ ջրաբուշտը կարող է լուրջ վերքի վերածվել, անգամ վարակի օջախ դառնալ: Ուստի դիաբետիկները պետք է ամեն օր լավ լվանան ոտքերը, չորացնեն ու ստուգեն` հայտնաբերելու վնասվածքները: Վերքերի սպիացման խանգարումները նույնպես կարող են պայմանավորված լինել երակների հիվանդություններով:

Եթե ցավ կա ոտքի բութ մատում. ապա դա կարող է վկայել պոդագրայի մասին: Հաջորդ պատճառը օստեոարթրիտն է: Եթե հոդերի շարժունակությունն է խանգարվել, ապա դա կարող է արթրիտի հետ կապված լինել, որի դեպքում ոսկրային գոյացություններ կարող են առաջանալ ու խանգարել նորմալ շարժմանը: Մարզիկների մոտ կարող է հոդաբորբի հետևանք լինել: Նման բորբոքում առաջանում է հոդի շուրջ գտնվող ջլերի վնասման պատճառով:

Կրունկների ցավի ամենահաճախ հանդիպող պատճառը ֆասցիտն է` բորբոքումն այն տեղում, որտեղ ջիլը միանում է ոսկրին: Ցավն այս դեպքում հատկապես ուժեղ է առավոտյան, արթնացման պահին ու անկողնուց վեր կենալու ժամանակ ոտքին հենվելու դեպքում: Կրունկի ցավ կարող է առաջանալ նաև ֆիզիկական մեծ ծանրաբեռնվածության, անհարմար կոշիկի ու ջլերի բորբոքման դեպքում: Հազվադեպ` կրունկի վրա ոսկրագոյացության, վարակի, ուռուցքի կամ կոտրվածքի ժամանակ:

Ոտքերը քարշ տալու պատճառը կարող է ոտքերում զգայնության կորուստը և նյարդերի ախտահարումը լինել: Բոլոր դեպքերի 30%-ը կապված է դիաբետի հետ: Բացի այդ, նյարդերը կարող են ախտահարվել նաև վարակների, հիպովիտամինոզների, ալկոհոլիզմի ու նյարդային համակարգի հիվանդությունների դեպքում: Երբեմն ախտահարման պատճառն անհնար է լինում պարզել:

Երբ ոտքերի մատները թմբուկի փայտիկներ են հիշեցնում

Դա առանձնահատուկ ախտանշան է, որի դեպքում ձեռքի ու ոտքերի մատները հաստանում են ծայրամասում, կորանում ու ոսպնյակի նմանվում: Նման փոփոխությունների հաճախ հանդիպող պատճառներ են համարվում թոքերի, սրտի, լյարդի, հիվանդությունները: Իսկ երբեմն թմբուկի ձևը կապված չի լինում որևէ հիվանդության հետ, այլ ընտանեկան առանձնահատկություն է համարվում:

Այտուցվող ոտքեր. սա ժամանակավոր տհաճություն է, որն առաջանում է ոտքի վրա երկար կանգնելու ու երկար քայլելու հետևանքով (հատկապես հղիության ժամանակ): Սակայն դա կարող է նաև ոտքերում արյան վատ շրջանառության, ավշային համակարգի, թրոմբի, երիկամների ու հիպոթիրեոզի հետևանք լինել:

Եթե միշտ են այտուցվում ոտքերը, ապա հարկավոր է բժշկի դիմել:

Եթե ցավ կա ոտնաթաթի փոքր մատներում

Եթե մրմուռ կամ հարվածող ցավ եք զգում ոտնաթաթի երեսի հատվածում, որը տարածվում է մատների վրա, ապա դա կարող է Մորթոնի նևրոմա լինել: Այս հիվանդության ժամանակ կոշտանում է նյարդը շրջապատող հյուսվածքը, որը սովորաբար տեղակայված է լինում 3-4 մատների արանքում ու առաջանում է մատների վրա չափազանց մեծ ճնշման հետևանքով, ասենք` բարձրակրունկներ հագնելիս: Դա կանանց մոտ 4 անգամ ավելի հաճախ է հանդիպում, քան տղամարդկանց մոտ:

Ոտնաթաթի քոր

Դա խոսում է սնկային վարակի մասին, որը, ի դեպ, շատ հաճախ է հանդիպում երիտասարդ տղամարդկանց մոտ: Սակայն քորը կարող է նաև կոսմետիկ միջոցների նկատմամբ ալերգիայի հետևանքով առաջանալ, որը կոչվում է շփումնային դերմատիտ: Իսկ եթե մաշկը ո՛չ միայն քոր է գալիս, այլև կոշտանում է, ապա դա կարող է փսորիազ լինել: Հատուկ միջոցներ կան, որոնք օգնում են նվազեցնելու այդ ախտանշանները:

Մատների մուրճանման դեֆորմացիա

Դա կարող է կապված լինել նեղ կոշիկի, ոստքերը սեղմող կամ նյարդերն ախտահարող հիվանդությունների հետ, ինչպիսիք են դիաբետը, ալկոհոլամոլությունը և այլն: Մատների հիմքը վեր է բարձրանում, մեջտեղում մատը ծալվում է ու մուրճի նմանվում: Այդ վիճակը ո՛չ միայն նպատակային վարժություն կպահանջի , այլև ճիշտ ընտրված կոշիկ, իսկ երբեմն էլ` վիրաբույժի միջամտություն:

Ոտնաթաթի մկանների կծկում, սպազմ: Հանկարծակի սուր ցավը, մկանային սպազմը կամ ցնցումը կարող է մի քանի րոպե տևել: Առաջանում է երկարատև աշխատանքի ու մկանային հոգնածության պատճառով: Նման կծկումներ կարող են առաջանալ նաև արյան շրջանառության, ջրի անբավարարության, կալիումի, մագնեզիումի, կալցիումի ու D վիտամինի հավասարակշռության խախտման պատճառով: Պակաս կարևոր դեր չեն խաղում հղիությունը կամ վահանաձև գեղձի հիվանդություններն ու տարբեր հորմոնների մակարդակի անհավասարաչափությունը: Եթե այդ կծկումները հաճախակի են կատարվում ու խիստ արտահայտված են, ապա պետք է բուժօգնության դիմել:

Մուգ բծեր ոտքերին

Մենք կարծում ենք, թե մաշկի քաղցկեղը միայն առաջանում է այն հատվածներում, որն անմիջականորեն արևի ազդեցության է ենթարկվում: Սակայն մելանոման` մաշկի քաղցկեղը, կարող է ո՛չ միայն մաշկի բաց հատվածներում առաջանալ, այլև եղունգի տակ ու նման լինել մուգ հետքի:

Դեղին եղունգներ

Բազմիցս խոսվել է, որ եղունգներն առողջության մասին են հուշում: Իսկ հաստացած դեղին եղունգները սնկային, ավշային համակարգի աշխատանքի խանգարման (ինչպես օրինակ՝ լիմֆեդեման), թոքերի ու ռևմատիկ արթրիտի հետևանք կարող են լինել:

Ճկված եղունգներ

Կամ էլ` գդալանման. առաջանում է վնասվածքների հետևանքով (հաճախ` օրգանական լուծիչների հետ շփումից կամ երկաթի անբավարարությունից):

Եղունգի վրա ակոսները կամ փոսիկներն առաջանում են եղունգների աճի խանգարման հետևանքով:

Հետաքրքիր է.

Մինչև XX դարասկիզբը Չինաստանի արիստոկրատիայի շրջանում սովորույթ կար. բոլոր մատները` բացի բութից, փաթաթում էին ոտնաթաթի տակ, ինչի հետևանքով այն այնքան էր դեֆորմացվում, որ կանայք այլևս չէին կարողանում քայլել: Դա նախանձելի արժանիք էր համարվում, քանի որ բարձր հասարակությունից սերված կանանց վայել չէր ինքնուրույն քայլելը, իսկ մեծ ոտնաթաթերը վկայում էին հասարակ ծագման մասին:

Հարցեր, պատասխաններ, մեկնաբանություններ